මාර්තු 8න් පසු කාන්තාවන්ට වෙනම දුම්රිය මැදිරියක්

මාර්තු අට වැනිදාට යෙදී තිබෙන කාන්තා දිනය වෙනුවෙන් කාර්යාල දුම්රියවල කාන්තාවන් සඳහා වෙනම දුම්රිය මැදිරි වෙන් කිරීමට සැලසුම් කර ඇති බවත් එළඹෙන අටවැනිදා වේයන්ගොඩ දුම්රිය ස්ථානයෙන් උදෑසන 6.59 මංගල ගමන ඇරඹෙන බවත් දුම්රිය සාමාන්‍ය අධිකාරි ඩිලන්ත ප්‍රනාන්දු මහතා පැවසීය.

ප්‍රවාහන හා සිවිල් ගුවන් සේවා අමාත්‍ය අර්ජුන රණතුංග මහතාගේ ප්‍රධානත්වයෙන් මෙය සිදු කරන බව ඩිලන්ත ප්‍රනාන්දු මහතා ලංකාදීපයට පැවැසීය.

කාන්තාවන් සඳහා වෙනම මැදිරි ක්‍රමය ලංකාවේ වසර ගණනකට පෙර ක්‍රියාත්මකව පැවතුන බවත් පසු කාලීනව එය අඩාල වූ බවද ඒ මහතා කීය.

දියුණු රටවල මෙම ක්‍රමවේදය සාර්ථකව ක්‍රියාත්මක වන බව සඳහන් කළ ඒ මහතා කාර්යාල දුම්රියවල පවතින අධික තදබදය හේතුවෙන් ඒවායේ ගමන් කරන කාන්තාවන්ට මුහුණ දීමට සිදුවනු ඇතැයි කියන අපහසුතා සහ අතවරද නව මැදිරි ක්‍රමයෙන් වැළකෙනු ඇති බවද පැවසීය.

මේ අනුව කාර්යාල දුම්රියන් වන බංගදෙනිය, සාගරිකා, සමුද්‍රදේවී, රඹුක්කන, මහව, පව්සි යන දුම්රියන්හි තුන්වන පංතියෙන් එක මැදිරිය බැගින් වෙන් කරන බව ඒ මහතා පැවසීය.

කාන්තාවන්ට වෙන් කළ මැදිරියට පිරිමි පුද්ගලයන්ට ගොඩවීම වැළැක්වීමටත් කාන්තාවන්ට වෙන් කළ සේවා මැදිරිය ඒ ලෙසම පවත්වාගෙන යෑමට ක්‍රමවේදයක් තිබේදැයි දුම්රිය ආරක්ෂක අංශ නිලධාරීන් ඒ සඳහා යොදවන්නේද යන්න විමසීමේදීෙ එයට පිළිතුරු දුන් ඒ මහතා කියා සිටියේ සිය අයිතිවාසිකම් රැකගැනීම උදෙසා අපේ කාන්තාව නොබියව ක්‍රියා කරන බවත් කාන්තා මැදිරි වලට කොස්සක් සහ ඉදලක් ලබා දීමෙන් මැදිරිය පුරුෂයන්ගෙන් රැක ගැනීමේ වගකීම ඔවුන්ටම බාර දෙන බවත්ය.

මහව කාර්යාල දුම්රියේ තුන්වන පංතියේ මැදිරියක් කාන්තාවන්ට වෙන් කිරීමේ කාර්ය අද දෙමටගොඩ ජල ශක්ති ධාවනාගාරයේදී එහි ප්‍රධාන අධික්ෂණ කළමනාකරු සනත් තෙන්නකෝන් මහතාගේ අධීක්ෂණය යටතේ සිදු කෙරිණි.

>> කාන්තා මැදිරි යොදවන දුම්රිය කාල සටහන පහතින්.

1. අලුයම 06.30 ට මීරිගම දුම්රිය ස්ථානයේ සිට කොළඹ කොටුව දුක්වා ධාවනය වන අංක 525 දරණ දුම්රිය

2. රඹුක්කන දුම්රිය ස්ථානයෙන් අලුයම 05.57 කොළඹ කොටුව දක්වා ගමන් අරඹන දුම්රිය

3. පොල්ගහවෙල දුම්රිය ස්ථානයෙන් අලුයම 05.25 කොළඹ කොටුව දක්වා ගමන් අරඹන දුම්රිය

4. මහව දුම්රිය ස්ථානයෙන් අලුයම 04.45 ට ගමන් අරඹන දුම්රිය

5. පුත්තලම දුම්රිය ස්ථානයෙන් අලුයම 04.30 ගල්කිස්ස බලා ගමන් අරඹන බංගදෙනිය කාර්යාල දුම්රිය

6. ගාල්ල දුම්රිය ස්ථානයෙන් අලුයම 05.00 ට සිට මරදාන දක්වා ගමන් අරඹන සමුද්‍රදේවී දුම්රිය

7. මාතර දුම්රිය ස්ථානයෙන් අලුයම 05.00 ට මරදාන බලා ගමන් අරඹන කාර්යාල දුම්රිය

Source
රේඛා තරංගනී ෆොන්සේකා
Lankadeepa.lk

Colombotimes.lk