මහව – ඕමන්තේ දුම්රිය මාර්ගය සම්පූර්ණයෙන්ම නවීකරණය කෙරේ..
වසර 115 කට පසුව මහව – ඕමන්තේ දුම්රිය මාර්ගය සම්පූර්ණයෙන්ම නවීකරණය කෙරේ…
උතුරු දුම්රිය මාර්ගයේ මහව – ඕමන්තේ දුම්රිය මාර්ගයට අයත් සම්පූර්ණ දිග කිලෝමීටර් 133 ක් වන අතර එහි මහව සිට අනුරාධපුර දක්වා කොටස ඉදිකරන ලද්දේ 1904 වර්ෂයේ දීය. අනුරාධපුරයේ සිට ඕමන්ත දක්වා කොටස 1905 වර්ෂයේදී ඉදි කෙරිණි. එතැන් සිට මේ දක්වා මෙම දුම්රිය මාර්ගයේ අත්‍යවශ්‍ය අලුත්වැඩියා හැර කිසිදු මහාපරිමාණ සංවර්ධනයක් සිදු කර නොමැත.
මේ හේතුවෙන් මහව සිට ඕමන්ත දක්වා කොටසේදී දුම්රිය ධාවනය වෙන්නේ අතැම් විට පැයට කිලෝමීටර් 40 කටත් වඩා අඩු වේගයෙන්. ඒ හේතුවෙන් එම කොටසෙහි දුම්රිය ධාවනයට පැය තුනක් පමණ ගත වේ. එමෙන්ම ආරක්ෂාවද ඉතා අඩු මට්ටමක පවතී. මේ කරුණු සැලකිල්ලට ගනිමින් මහව සිට ඕමන්ත දුම්රිය මාර්ගය ගලවා සම්පූර්ණයෙන්ම අලුතින් සකස් කිරීමේ ව්‍යාපෘතියක් ආරම්භ කර තිබෙනවා.
එහි ඉදිකිරීම් කොන්ත්‍රාත්තුව අත්සන් කෙරුණේ ප්‍රවාහන සහ සිවිල් ගුවන්සේවා අමාත්‍යාංශය සහ ඉදිකිරීම් කොන්ත්‍රාත්තුව හිමි IRCON International Limited සමාගම අතර යි.
නව දුම්රිය මාර්ගය වසර දෙකකින් නිම කිරීමටත් එම සමාගම අපේක්ෂා කරනවා.
උපුටා ගැනීම සහ චායාරූප : මාධ්‍ය ඒකකය – ප්‍රවාහන සහ සිවිල් ගුවන්සේවා අමාත්‍යාංශය